خرافة الحب من اول نظره

عمليا وعاطفيا


علشان نعرف ليه لازم نعرف ايه ميكانزم ما يسمى "الحب من اول نظرة" (مع التحفظ على تصنيفه تحت بند "حب")





كل شخص فينا عنده جواه ترمومتر داخلى : مقياس اهمية
اللى بيحصل انك لما بتشوف او تتقابل مع جروب من الطرف الاخر بتحس ان شخص معين ارتفع فى مقياس الاهمية عندك عن الباقى
وبيكون "جذاب" اكتر بالنسبة لك دونا عن الباقى مع انه جايز ميكونش الافضل (على ما اعتقد كلنا مرنا بالتجربة دى)
ايه السر ؟
فى نظرية بتقول ان كل واحد فينا عنده جواه صورة مكونها فى اللاوعى لشريك حياته
اول لما نشوف اشخاص من الطرف الاخر بنبتدى نقارن بشكل غير ارادى بينهم وبين الصورة اللى جوانا
وبيعتمد مدى انجذابنا للاشخاص على مدى توافقهم مع الصورة دى



طب بعد ما فهمنا القصة دى ...ليه بقى ده مش حب ؟
طب ده هيخلينا نسأل :
ايه هو الحب ؟
نقدر نقول انه تعبير عن اعمق مشاعر التقدير للطرف الاخر
ادراك عميق لاحتياجات واشواق الطرف الاخر فى الماضى و الاحضر والمستقبل
حب مضحى باذل يرعى شعور الاخر ,مجرد من الانانية


وواضح جدا ان دى مش مواقف شخص "وقع" من اول نظرة
الحب الحقيقى "نمو" مش "وقوع"
يعنى عامل الوقت مهم جدا لاكتشاف صفات الاخر واحتياجاته وتقدير شخصيته بعمق
ومن اول نظرة مافيش عامل الوقت اساسا يبقى العلاقة سطحية



نقطة تانية مهمة
من نظرة واحدة او حتى عدة نظرات انت عرفت ايه عن اللى قدامك ؟
امور خارجية بس وشكليات وباقى شخصيته وكل الامور الداخلية مجهولة او انت مفترض مسبقا انها شبه الصورة اللى كونتها عنه جواك وده وهم كبير نهايته صدمة
هنا هقولك بكل ثقة ان الشخص مستحيل يحب حاجة مجهولة حتى لو كانت جميلة ...هو فى الحالة دى "اعجب" و "انجذب" بالشكل الخارجى بس...ولا الاعجاب ولا الانجذاب هو الحب !



هى دى العواطف اللى حصلت فى الموقف اللى فات :
انجذاب, اثارة رومانسية, او حتى رغبة فى الحصول على جايزة اجتماعية مرغوبة بالنسبة لك ...
تبتدى تقول لنفسك "ايه اللى بيحصلى ده وايه الاحاسيس دى" "بس هو ده الحب ده اروع شيئ حسيت بيه" "انا عايز افوز بيها (بيه)"


العواطف اللى نشأت من اول نظرة دى مينفعش تكون حب حقيقى
دى عواطف تتسم بالانانية ومينفعش تكون ضمان او اساس لارتباط ناجح او حتى "حب"
انت فى الحالة دى وقعت فى حب الحب نفسه مش حب الشخص وفى فرق شاسع
الفرق ان الدافع هو اشباع رغبتك العاطفية او نقص من اى نوع (يعنى رغبة فى الاخذ والتملك والاخر بيكون شيئ او سلم للوصول للهدف ده)




الاعتقاد بأن "الحب من اول نظرة بيحصل" هو علامة على قلة النضج وخرافة لازم تتحرر منها
لازم تكون امين وصادق مع نفسك فى مشاعرك وتدرك ان ده مش "حب"


بقلمى
شكرا